TE ARIKINUI KUINI NGA WAI HONO I TE PO POOTATAU TE WHEROWHERO VIII

Mihi aroha ki te Arikinui Kuini Nga wai hono i te po.

“Taakiri tuu e te iwi ki te mana motuhake, Taakiri tuu e te iwi ki te kotahitanga”

Ka hua au i te whatitiri e whakatuupuru nei ki runga ki te rangi, kaaore ko te unuhanga o te taniwha i te rua.

Kiingi Tuheitia Potatau Te Wherowhero VII Te Kiingi O Te Kotahitanga
Moe mai raa i roto i te aroha.

Noho mai raa e Rangi kei taku Arikinui Kuini Nga wai hono i te po Pootatau Te Wherowhero VIII i runga i te ahurewa o ngoo tuupuna. 

Ko koe te hiri o Waikato, te mana te tapu me te ihi o motu rire rire hau paimaarire ki too ingoa tapu. 

Hiinei raa e horapa ana ko te mihi o te ngaakau o (Kāhui Hauora Tūmatanui o Aotearoa | Public Health Association of New Zealand) ki a koe me Waikato whaanui e noho ana ki te karama o ngaa mahi manaaki i te tangata i roto i ngaa wiki kua pahure ake nei. Ko te kokonga o te ngaakau i kitea, ko te kokonga o te ngaakau i rangona hoki. Koia nei taa maatou e tuu tautoko ana, e taituara ana moou i roto i ngoo mahi katoa. Kia tauwhiro ngaa manaakitanga ki runga i a koe me too whare tapu. 

Ka waiho maa ngaa kupu aa too tupuna a Kiingi Koroki Potatau Te Wherowhero V hei whakatitina mai.

‘Mehemea me mahi pai moo te tangata, mahia’

Te Kāhui Hauora Tūmatanui o Aotearoa